Үндэсний энгийн цахим гадаад паспорт олгож эхэллээ

A- A A+
Үндэсний энгийн цахим гадаад паспорт олгож эхэллээ

Улсын бүртгэлийн байгууллага 2023 оны 03 дугаар сарын 01-ний өдрөөс Үндэсний энгийн цахим гадаад паспортын захиалгыг авч эхэлсэн бөгөөд өнөөдрөөс /2023.03.15/ иргэдэд олгож эхэллээ. Анхны Үндэсний энгийн цахим гадаад паспорт эзэд дээрээ очиж буйтай холбогдуулан Чингэлтэй дүүргийн Улсын бүртгэлийн хэлтэст нээлтийн арга хэмжээ болов. Уг нээлтийн арга хэмжээнд ХЗДХэргийн сайд, тус яамны удирдлагууд, мөн Улсын бүртгэлийн байгууллагын дарга, нэгжийн удирдлага, хэвлэл мэдээллийн байгууллагын төлөөлөл, сэтгүүлчид, иргэд оролцсон юм.

Нээлтийн арга хэмжээг нээж ХЗДХэргийн сайд Х.Нямбаатар үг хэлж, анхны Үндэсний энгийн цахим гадаад паспорт захиалсан иргэдэд цахим паспортыг гардуулан өглөө. ХЗДХэргийн сайд Х.Нямбаатар хэлэхдээ “Өнөөдөр Улсын бүртгэлийн байгууллагын түүхэнд төдийгүй, Монгол улсын хувьд содон, дэвшилттэй өдөр тохиож байна. Монгол улс ИКАО-ын гишүүн орныхоо хувьд ИКАО-ын Нийтийн түлхүүрийн санд 82 дахь гишүүн орноор элсэн орж, үндэсний энгийн цахим гадаад паспортыг иргэддээ олгож эхэлж байна. Монгол улсын Засгийн газраас дэвшүүлж байгаа “Цахим үндэстэн” хөтөлбөрийн хүрээнд хийгдэж байгаа хамгийн том ажил бол Монгол улсын иргэдэд Үндэсний энгийн гадаад паспортаас гадна цахим чиптэй гадаад паспортыг хэрэглээнд нэвтрүүлэн, шинэчлэлт хийх ажил байсан. Мөн бид энэ оны 6 дугаар сарын 1-ний өдрөөс эхлэн Олон улсын Чингис хаан нисэх буудалд цахим гарцыг нэвтрүүлж, ашиглалтад оруулахаар төлөвлөн ажиллаж байна. Ингэснээр Монгол улсын иргэд гадаадад зорчих болон гадаадаас ирэхдээ энэхүү цахим гадаад паспортыг ашиглан хилийн шалган нэвтрүүлэх цэгээр хүнтэй харьцалгүй, тусгай төхөөрөмжид уншуулан Монгол улсын хилээр нэвтрэх боломжтой болно” гэж цохон тэмдэглэлээ.

Үндэсний энгийн цахим гадаад паспорт олгох нээлтийн арга хэмжээ Аймаг, дүүргийн Улсын бүртгэлийн хэлтэс, Нэгдсэн үйлчилгээний төвүүдэд мөн зохион байгуулагдаж байна.

Дашрамд дурдахад ИКАО-ын Нийтийн түлхүүрийн санд гишүүнчлэлтэй 90 гаруй орон өөр хоорондоо нэгдсэн мэдээллийн сангаараа дамжуулан хурдан шуурхай мэдээлэл солилцох боломж бүрдэж байна.